JEE Advanced 2026નું પરિણામ જાહેર, શુભમ કુમારે AIR-1 સાથે ટોપ કર્યું

દેશભરના લાખો એન્જિનિયરિંગ વિદ્યાર્થીઓની આતુરતાનો અંત આવ્યો છે. JEE Advanced 2026નું પરિણામ સત્તાવાર રીતે જાહેર કરવામાં આવ્યું છે. આ પરિણામના આધારે દેશની પ્રતિષ્ઠિત IIT સંસ્થાઓમાં પ્રવેશ આપવામાં આવશે. આ વર્ષે દિલ્હી ઝોનના શુભમ કુમારે શાનદાર પ્રદર્શન કરીને ઓલ ઈન્ડિયા રેન્ક-1 (AIR-1) હાંસલ કરી પ્રથમ સ્થાન મેળવ્યું છે.

પરિણામ જાહેર થતાં જ સફળ ઉમેદવારોમાં ખુશીની લાગણી જોવા મળી રહી છે. હવે આગામી તબક્કા તરીકે JoSAA કાઉન્સેલિંગ પ્રક્રિયા શરૂ થવાની છે, જેના આધારે વિદ્યાર્થીઓને વિવિધ IIT અને અન્ય અગ્રણી એન્જિનિયરિંગ સંસ્થાઓમાં પ્રવેશ મળશે.

IIT રૂડકીએ જાહેર કર્યું પરિણામ

JEE Advanced 2026 પરીક્ષાનું આયોજન IIT રૂડકી દ્વારા કરવામાં આવ્યું હતું. પરીક્ષા 17 મે 2026ના રોજ બે સત્રમાં લેવામાં આવી હતી. પરિણામ 31 મેની રાત્રે સત્તાવાર વેબસાઇટ પર જાહેર કરવામાં આવ્યું છે. ઉમેદવારો હવે પોતાનો સ્કોરકાર્ડ ડાઉનલોડ કરીને પોતાની રેન્ક અને ગુણ ચકાસી શકે છે.

ટોપ રેન્કર્સમાં દિલ્હી ઝોનનું પ્રભુત્વ

કોમન રેન્ક લિસ્ટમાં દિલ્હી ઝોનના શુભમ કુમારે 360માંથી 330 ગુણ મેળવી પ્રથમ સ્થાન મેળવ્યું છે. બીજા ક્રમે કબીર છિલ્લર રહ્યા, જેમણે 329 ગુણ મેળવ્યા હતા. ત્રીજા સ્થાને જતિન ચાહર રહ્યા, જેમણે 319 ગુણ સાથે ટોચના ત્રણમાં સ્થાન મેળવ્યું.

ખાસ વાત એ રહી કે આ વર્ષે ટોચની ત્રણેય રેન્ક દિલ્હી ઝોનના વિદ્યાર્થીઓએ પોતાના નામે કરી છે. મહિલા ઉમેદવારોમાં દિલ્હી ઝોનની આરોહી દેશપાંડે સૌથી આગળ રહી. તેમણે 280 ગુણ મેળવ્યા અને કોમન રેન્ક લિસ્ટમાં 77મું સ્થાન પ્રાપ્ત કર્યું.

મુખ્ય રેન્કર્સની માહિતી

56 હજારથી વધુ ઉમેદવારો સફળ

આ વર્ષે JEE Advanced 2026 માટે 1.87 લાખથી વધુ વિદ્યાર્થીઓએ નોંધણી કરાવી હતી. તેમાંમાંથી આશરે 1.79 લાખ ઉમેદવારો બંને પેપરમાં હાજર રહ્યા હતા. જાહેર થયેલા પરિણામ અનુસાર કુલ 56,880 ઉમેદવારો સફળ જાહેર થયા છે. તેમાં 10,107 વિદ્યાર્થીનીઓનો સમાવેશ થાય છે.

IIT રૂડકીના ડિરેક્ટર પ્રોફેસર કમલ કિશોર પંતે સફળ ઉમેદવારોને અભિનંદન પાઠવતાં જણાવ્યું કે વિદ્યાર્થીઓએ હવે JoSAA 2026 કાઉન્સેલિંગ પ્રક્રિયામાં સક્રિયપણે ભાગ લેવો જોઈએ જેથી તેઓ પોતાની પસંદગીની સંસ્થામાં પ્રવેશ મેળવી શકે.

JEE Advanced દેશની સૌથી પ્રતિષ્ઠિત એન્જિનિયરિંગ પ્રવેશ પરીક્ષાઓમાંની એક માનવામાં આવે છે. દર વર્ષે લાખો વિદ્યાર્થીઓ IITમાં પ્રવેશ મેળવવાના સપના સાથે આ પરીક્ષા આપે છે. પરિણામ જાહેર થયા બાદ હવે વિદ્યાર્થીઓ અને વાલીઓની નજર JoSAA કાઉન્સેલિંગ અને સીટ એલોટમેન્ટ પ્રક્રિયા પર કેન્દ્રિત થઈ છે.