બાલાસર પોલીસની કાર્યવાહીથી બેલા ગામમાં જુગારધામ ઝડપાયું

ગાંધીધામ નજીક બાલાસર પોલીસ સ્ટેશન વિસ્તારમાં આવેલા બેલા ગામ ખાતે પોલીસે જુગાર રમતા સાત ઈસમોને ઝડપી પાડ્યા છે. મળતી માહિતી મુજબ, બાલાસર પોલીસને બાતમી મળી હતી કે ગામમાં કેટલાક લોકો ગંજીપત્તા વડે હાર-જીતનો જુગાર રમી રહ્યા છે.

બાતમીના આધારે બાલાસર પોલીસ સ્ટેશનના હેડ કોન્સ્ટેબલ રવજીભાઈ જીવરામભાઈ પટેલ અને કોન્સ્ટેબલ વજાભાઈ હરિભાઈ મકવાણાની ટીમે કાર્યવાહી હાથ ધરી હતી. પોલીસે બાલાસર પોલીસ સ્ટેશનથી પૂર્વ દિશામાં આશરે 17 કિલોમીટર દૂર આવેલા બેલા ગામમાં દરોડો પાડ્યો હતો.

તમામ આરોપીઓ બેલા ગામના રહેવાસી

પોલીસે ઘટનાસ્થળેથી શંભુ ખુમાણ પરમાર (ઉ.વ. 52), મુરા કરમણ બગડા (ઉ.વ. 51), ખાના દેવજી બગડા (ઉ.વ. 54), અભુ લાધા પરમાર (ઉ.વ. 32), લાધા દેસરા પૈયડા (ઉ.વ. 70), રણછોડ જગા પરમાર (ઉ.વ. 55) અને કરશન મલુ રાઠોડ (ઉ.વ. 60) ને જુગાર રમતા ઝડપી પાડ્યા હતા. તમામ આરોપીઓ બેલા ગામ, તા. રાપરના રહેવાસી હોવાનું સામે આવ્યું છે.

રોકડ રકમ અને ગંજી પત્તા કબજે

પોલીસે આરોપીઓ પાસેથી રોકડ રકમ રૂ. 19,330 તેમજ ગંજી પત્તાના 52 પાના કબજે કર્યા હતા. સમગ્ર મુદ્દામાલ કબજે કરીને પોલીસે જુગાર ધારાની કલમ 12 મુજબ ગુનો નોંધી આગળની કાયદેસરની કાર્યવાહી હાથ ધરી છે.

પોલીસની આ કાર્યવાહીને પગલે વિસ્તારમાં જુગાર પ્રવૃત્તિઓમાં સંડોવાયેલા તત્વોમાં ફફડાટ ફેલાયો છે.