મોતિયો મુક્ત અભિયાનને મળ્યો નવો વેગ, કે.સી.આર.સી.ને ડીપી વર્લ્ડ મુંદરાએ અર્પણ કરી બોલેરો ગાડી

કચ્છમાં આંખની સારવાર માટે મહત્વપૂર્ણ પહેલ

કચ્છમાં ચાલી રહેલા મોતિયો મુક્ત અભિયાનને વધુ ગતિ આપવા માટે ભુજ સ્થિત અંધજન મંડળ કે.સી.આર.સી.ને ડીપી વર્લ્ડ મુંદરા દ્વારા બોલેરો ગાડી અર્પણ કરવામાં આવી છે. આ વાહન દ્વારા હવે અંતરિયાળ અને છેવાડાનાં ગામોમાં આંખના રોગોની સારવાર અને ચકાસણી માટે વધુ સરળતાથી કેમ્પો યોજી શકાશે.

અંધજન મંડળ આંખની હોસ્પિટલ દ્વારા સમગ્ર કચ્છ જિલ્લામાં મોતિયો મુક્ત અભિયાન ચલાવવામાં આવી રહ્યું છે. આ અભિયાન અંતર્ગત ગામડાઓમાં જઈ આંખના તમામ પ્રકારના રોગોની તપાસ અને સારવાર માટે કેમ્પો યોજવામાં આવે છે. સાથે જ “માંગો ત્યાં કેમ્પ” યોજના હેઠળ લોકો સુધી આરોગ્ય સેવાઓ પહોંચાડવામાં આવી રહી છે.

નલિયા, નખત્રાણા અને મુંદરામાં કાર્યરત કેન્દ્રો

અંધજન મંડળ દ્વારા નલિયા, નખત્રાણા અને મુંદરામાં કાયમી ચક્ષુ સારવાર કેન્દ્રો કાર્યરત છે, જ્યાં રોજિંદી આંખની સારવારની સુવિધા આપવામાં આવે છે. નવા વાહનના ઉમેરાથી હવે ગ્રામ્ય વિસ્તારોમાં પહોંચ વધુ ઝડપી અને અસરકારક બનશે.

ડીપી વર્લ્ડના સહયોગથી સેવા કાર્યને મજબૂતી

ડીપી વર્લ્ડ મુંદરાએ પોતાના સી.એસ.આર. અંતર્ગત એમ.આઈ.સી.ટી.ના આર્થિક સહયોગથી આ મેડિકલ વાહન અર્પણ કર્યું છે. કાર્યક્રમ દરમિયાન ડીપી વર્લ્ડના સી.ઈ.ઓ. આલોક મિશ્રા, એચ.આર. ડાયરેક્ટર અશિતા જૈન સહિત અનેક અધિકારીઓ ઉપસ્થિત રહ્યા હતા.

અંધજન મંડળના મેનેજર અરાવિંદાસિંહ ગોહિલને ગાડીની ચાવી અર્પણ કરવામાં આવી હતી. ત્યારબાદ રિબિન કાપીને કાર્યક્રમની શરૂઆત કરવામાં આવી હતી.

110થી વધુ લોકોની આંખની તપાસ

આ પ્રસંગે ડીપી વર્લ્ડના કર્મચારીઓ માટે ખાસ આંખ તપાસ કેમ્પનું આયોજન કરવામાં આવ્યું હતું. કેમ્પ દરમિયાન 110થી વધુ લોકોની આંખોની તપાસ કરવામાં આવી હતી.

કાર્યક્રમમાં એચ.આર. ડાયરેક્ટર અશિતા જૈને ડીપી વર્લ્ડ દ્વારા કરવામાં આવતી વિવિધ સેવાકીય પ્રવૃત્તિઓ વિશે માહિતી આપી હતી. સાથે જ સી.એસ.આર. હેડ શ્રી બોસ્કો પ્રત્યે પણ આભાર વ્યક્ત કરવામાં આવ્યો હતો.