કચ્છમાં અષાઢી બીજે ડબલ ભૂકંપ, ખાવડા અને ધોળાવીરા નજીક અનુભવાયા ભૂકંપના આંચકા

કચ્છ: કચ્છમાં અષાઢી બીજના દિવસે ખાવડા અને ધોળાવીરા નજીક બે મિનિટના અંતરે બે ભૂકંપના આંચકા નોંધાયા. પ્રથમ આંચકો 3.6 અને બીજો 3.2ની તીવ્રતાનો રહ્યો.

કચ્છીઓ માટે નવા વર્ષની શરૂઆત કરાવતા પવિત્ર અષાઢી બીજના દિવસે જ જિલ્લામાં ભૂકંપના બે આંચકા નોંધાતા લોકોમાં ક્ષણિક ચિંતા ફેલાઈ હતી. બપોરના સમયે Khavda અને Dholavira નજીક બે મિનિટના અંતરે આવેલા આંચકાઓને કારણે કેટલાક વિસ્તારોમાં લોકો સાવચેતીના ભાગરૂપે ઘરની બહાર નીકળી આવ્યા હતા. જોકે, હાલ સુધી કોઈ જાનહાનિ કે મિલકતને નુકસાન થયાની માહિતી સામે આવી નથી.

ભૂકંપ વિજ્ઞાન કેન્દ્રના પ્રાથમિક અહેવાલ મુજબ પ્રથમ આંચકો બપોરે 2:20 વાગ્યે કચ્છના Khavda વિસ્તારમાં નોંધાયો હતો. તેની તીવ્રતા રિક્ટર સ્કેલ પર 3.6 માપવામાં આવી હતી. ભૂકંપનું કેન્દ્રબિંદુ ખાવડાથી અંદાજે 32 કિલોમીટર દૂર હોવાનું જણાવાયું છે.

પ્રથમ આંચકાના માત્ર બે મિનિટ બાદ એટલે કે 2:22 વાગ્યે ફરી એકવાર કચ્છમાં ધરતી ધ્રૂજી હતી. આ વખતે Dholavira નજીક રિક્ટર સ્કેલ પર 3.2ની તીવ્રતાનો ભૂકંપ નોંધાયો હતો. તેનું કેન્દ્રબિંદુ પણ ધોળાવીરાથી અંદાજે 32 કિલોમીટર દૂર હોવાનું સામે આવ્યું છે.

અષાઢી બીજના પાવન અવસરે સમગ્ર કચ્છમાં નવા વર્ષની ઉજવણી, ધાર્મિક કાર્યક્રમો અને ભગવાન જગન્નાથની રથયાત્રાના વિવિધ આયોજનો ચાલી રહ્યા હતા. તે દરમિયાન આવેલા ભૂકંપના આંચકાઓને કારણે લોકોમાં થોડા સમય માટે ગભરાટનો માહોલ સર્જાયો હતો. જોકે, આંચકાની તીવ્રતા ઓછી હોવાથી કોઈ મોટી દુર્ઘટનાના અહેવાલ પ્રાપ્ત થયા નથી.

ભૂસ્તરશાસ્ત્રના દૃષ્ટિકોણથી કચ્છ દેશના સૌથી વધુ Earthquake Prone Zone પૈકીનો એક વિસ્તાર માનવામાં આવે છે. અહીં સમયાંતરે નાના અને મધ્યમ તીવ્રતાના ભૂકંપ નોંધાતા રહે છે. તેથી ભૂકંપના આંચકા સમયે ગભરાવાને બદલે સુરક્ષા માર્ગદર્શિકાનું પાલન કરવાની નિષ્ણાતો સલાહ આપે છે.