મમતા બેનર્જીએ CJPના વિરોધ પ્રદર્શનને આપ્યું ખુલ્લું સમર્થન, કહ્યું- જરૂર પડશે તો વિરોધ પ્રદર્શનમાં પણ જોડાઈશ

પશ્ચિમ બંગાળના મુખ્યમંત્રી અને તૃણમૂલ કોંગ્રેસ (TMC)ના અધ્યક્ષ મમતા બેનર્જીએ CJPના વિરોધ પ્રદર્શનને લઈને મહત્વપૂર્ણ નિવેદન આપ્યું છે. તેમણે કહ્યું કે CJPના પ્રદર્શનકારીઓને શરૂઆતથી જ તેમનો સંપૂર્ણ સમર્થન મળતું આવ્યું છે અને જો જરૂર પડશે તો તેઓ વ્યક્તિગત રીતે પણ વિરોધ પ્રદર્શનમાં જોડાશે. તેમના આ નિવેદન બાદ રાજકીય વર્તુળોમાં નવી ચર્ચા શરૂ થઈ છે.

જંતર-મંતર પર આખી રાત ચાલ્યું વિરોધ પ્રદર્શન

દિલ્હીના જંતર-મંતર પર CJPના સમર્થકો ભારે વરસાદ અને કડક સુરક્ષા વ્યવસ્થા વચ્ચે આખી રાત વિરોધ પ્રદર્શન કરતા રહ્યા હતા. એક દિવસ અગાઉ યોજાયેલા Sansad Chalo March દરમિયાન પોલીસ કાર્યવાહી થતાં કેટલાક પ્રદર્શનકારીઓ ઘાયલ થયા હતા. ત્યારબાદ મંગળવારે સવારે કાર્યકર્તાઓએ પ્રદર્શન સ્થળની સફાઈ કરી હતી.

CJPના સ્થાપક અભિજીત દીપકેએ પોલીસ કાર્યવાહીમાં ઇજાગ્રસ્ત થયેલા સમર્થકો પાસે માફી માગી હતી અને સમગ્ર ઘટનાને દુર્ભાગ્યપૂર્ણ ગણાવી હતી.

ભાજપ સામે તમામ વિપક્ષી પક્ષોને એક થવાની અપીલ

મમતા બેનર્જીએ પશ્ચિમ બંગાળમાં ભાજપ સામે મજબૂત લડત માટે INDIA ગઠબંધનના તમામ પક્ષોને મતભેદ ભૂલીને સાથે આવવાની અપીલ કરી હતી. તેમણે કહ્યું કે ભાજપ સામેની રાજકીય લડાઈ કોઈ વ્યક્તિગત અહંકારથી મોટી છે અને તમામ વિપક્ષી પક્ષોએ સંયુક્ત રીતે ચૂંટણી અને જનઆંદોલનોમાં ભાગ લેવો જોઈએ.

તેમણે ભારપૂર્વક કહ્યું કે દેશના લોકશાહી મૂલ્યો અને બંધારણીય વ્યવસ્થાને મજબૂત રાખવા માટે વિપક્ષની એકતા જરૂરી છે.

બળવાખોર નેતાઓને લઈને મમતાનું કડક વલણ

મમતા બેનર્જીએ તૃણમૂલ કોંગ્રેસ છોડીને ભાજપ સાથે જોડાયેલા અથવા ભાજપને સમર્થન આપતા નેતાઓ પર પણ નિશાન સાધ્યું. તેમણે સ્પષ્ટ શબ્દોમાં કહ્યું કે આવા નેતાઓને ફરીથી પાર્ટીમાં સ્થાન આપવામાં આવશે નહીં.

તેમણે આરોપ લગાવ્યો કે કેટલાક બળવાખોર નેતાઓ ભાજપના ઇશારે કામ કરી રહ્યા છે અને પાર્ટીની છબીને નુકસાન પહોંચાડવાનો પ્રયાસ કરી રહ્યા છે. જો કોઈ નેતા ભાજપને સમર્થન આપવા માંગે છે તો તેણે ખુલ્લેઆમ ભાજપમાં જોડાઈ જવું જોઈએ, એમ પણ તેમણે જણાવ્યું.

યુવા કાર્યકર્તાઓને મળશે તક

મમતાએ જણાવ્યું કે પાર્ટી છોડીને જનાર નેતાઓથી ખાલી થયેલી જગ્યાઓ યુવા અને વિદ્યાર્થી કાર્યકર્તાઓને આપવામાં આવશે. તેમના મતે યુવા નેતૃત્વને આગળ લાવવાથી સંગઠન વધુ મજબૂત બનશે. આ નિવેદન એવા સમયે આવ્યું છે જ્યારે તૃણમૂલ કોંગ્રેસની અંદર આંતરિક મતભેદોની ચર્ચા ચાલી રહી છે.