NTA એ છબરડાઓના કારણે UGC-NET ના 3 પેપર રદ કર્યા, 9 અને 10 સપ્ટેમ્બરે ફરીથી લેવાશે પરીક્ષા

UGC NET: નેશનલ ટેસ્ટિંગ એજન્સી (NTA) એ ગત 22 થી 30 જૂન વચ્ચે લેવાયેલી UGC-NET પરીક્ષાના ત્રણ પેપર રદ કરવાની જાહેરાત કરી છે. પરીક્ષામાં થયેલી અનેક ભૂલો, સ્પેલિંગ મિસ્ટેક અને અગાઉના વર્ષના પ્રશ્નો રિપીટ થવાને કારણે હવે સોશિયોલોજી (Sociology), અંગ્રેજી (English) અને કોમર્સ (Commerce) વિષયની પરીક્ષા ફરીથી લેવામાં આવશે.

આસિસ્ટન્ટ પ્રોફેસરની લાયકાત અને પીએચડી (PhD) પ્રોગ્રામમાં પ્રવેશ માટે લેવાતી આ મહત્વની પરીક્ષાના પ્રશ્નપત્રોમાં ગરબડ સામે આવ્યા બાદ NTA એ આ નિર્ણય લીધો છે. 3 મેના રોજ લેવાયેલી NEET-UG 2026 પરીક્ષાના પેપર લીક વિવાદ બાદ આ વર્ષે એજન્સી દ્વારા રદ કરવામાં આવેલી આ બીજી મોટી પરીક્ષા છે.

પેપરમાં રહેલી ભૂલોની તપાસ કરવા માટે NTA દ્વારા એક સમિતિની રચના કરવામાં આવી હતી. સમિતિના અહેવાલ મુજબ, આ ત્રણેય પેપરમાં વ્યાપક હકીકતલક્ષી ભૂલો, અનુવાદની ક્ષતિઓ, પુસ્તકોના ખોટા નામ, વ્યાકરણ અને વિરામચિહ્નોની ભૂલો જોવા મળી છે. પરીક્ષા પારદર્શક અને ક્ષતિમુક્ત રહે તે હેતુથી સમિતિએ આ પેપર ફરીથી લેવાની ભલામણ કરી હતી.

સોશિયોલોજીના પેપરમાં ઉમેદવારોએ નામોના સ્પેલિંગમાં મોટી ભૂલો પકડી હતી. જેમાં જાણીતા વિદ્વાનોના નામ ખોટી રીતે લખવામાં આવ્યા હતા. ઉદાહરણ તરીકે, “Ritzer” ની જગ્યાએ “Putzer”, “Ghurye” ના બદલે “Ghunye”, “Parsons” નું “Parsow” અને “Nussbaum” ને “Nusbaut” તરીકે દર્શાવવામાં આવ્યા હતા.

અંગ્રેજીના પેપરમાં અગાઉના વર્ષોના, ખાસ કરીને ડિસેમ્બર 2024 અને 2025 ના પ્રશ્નો બેઠેબેઠા રિપીટ થયા હોવાનો ઉમેદવારો અને કોચિંગ શિક્ષકોએ દાવો કર્યો હતો. આમાં 'કાંથાપુરા'ના પ્રકાશનનું વર્ષ, 'ધ લાઈફ ડિવાઈન'ના લેખક, 'ધ ટાઇમ મશીન' અને 'બ્રેવ ન્યૂ વર્લ્ડ'ના શૈલી આધારિત વર્ગીકરણ, તેમજ વિલિયમ શેક્સપિયરના નાટકોની ક્રોનોલોજી સંબંધિત પ્રશ્નો સામેલ હતા. આ ઉપરાંત, જેક ડેરિડા અને રોલાન્ડ બાર્થ્સ જેવા વિવેચકોના 'જોડકાં જોડો' (Match the Following) પ્રકારના પ્રશ્નો પણ તેના સમાન વિકલ્પો સાથે ફરીથી પૂછવામાં આવ્યા હતા.

કોમર્સની પરીક્ષામાં પણ જૂના પ્રશ્નો પૂછાયા હોવાની ફરિયાદો ઉઠી હતી. જેમાં બ્રેક-ઈવન એનાલિસિસ અને માર્જિન ઓફ સેફ્ટીના આંકડાકીય પ્રશ્નો અગાઉની પરીક્ષા જેવા જ હતા. આ સાથે આર્મ્સ લેન્થ પ્રાઇસિંગ, સેક્શન 194C અને 194F હેઠળના કોર્પોરેટ ટેક્સની જોગવાઈઓ, તેમજ મોડિગ્લિઆની-મિલર હાઇપોથિસિસ અને સર્વિસ માર્કેટિંગના એક્સટેન્ડેડ 7 Ps જેવા પ્રશ્નોના વિકલ્પો પણ સમાન ક્રમમાં જ રજૂ કરવામાં આવ્યા હતા.

NTA ની સત્તાવાર જાહેરાત મુજબ, હવે અંગ્રેજી વિષયની પરીક્ષા 9 સપ્ટેમ્બરે સવારે 9 થી બપોરે 12 વાગ્યા સુધી અને કોમર્સની પરીક્ષા તે જ દિવસે બપોરે 3 થી સાંજે 6 વાગ્યા દરમિયાન યોજાશે. જ્યારે સોશિયોલોજી વિષયનું પેપર 10 સપ્ટેમ્બરે સવારે 9 થી 12 વાગ્યાની શિફ્ટમાં લેવામાં આવશે.

એજન્સીએ સ્પષ્ટતા કરી છે કે આ ફરીથી લેવાનારી પરીક્ષા માટે ઉમેદવારો પાસેથી કોઈ વધારાની ફી લેવામાં આવશે નહીં. પરીક્ષા કેન્દ્ર, શહેર અને એડમિટ કાર્ડ અંગેની વધુ વિગતો સત્તાવાર વેબસાઇટ પર અલગથી જાહેર કરવામાં આવશે. માળખાકીય રીતે જોઈએ તો, UGC-NET પરીક્ષામાં કુલ બે પેપર હોય છે, જેમાં પેપર-1 માં 50 પ્રશ્નો અને પેપર-2 માં વિષય આધારિત 100 પ્રશ્નો પૂછવામાં આવે છે.