સુપ્રીમ કોર્ટનો મોટો આદેશ: વિદ્યાર્થીઓ સામે હાલ કોઈ કાર્યવાહી નહીં, બેકસૂર અને સગીરોને તાત્કાલિક મુક્ત કરવાનો નિર્દેશ

Jantar Mantar Protest: સુપ્રીમ કોર્ટે વિદ્યાર્થી આંદોલન મામલે મહત્વપૂર્ણ રાહત આપતાં હાલ વિદ્યાર્થીઓ સામે પોલીસ કાર્યવાહી પર રોક લગાવી છે. બેકસૂર અને સગીરોને મુક્ત કરવાનો આદેશ આપતાં તમામ પુરાવા સુરક્ષિત રાખવા પણ કહ્યું.

વિદ્યાર્થી આંદોલનને લઈને સુપ્રીમ કોર્ટે મહત્વપૂર્ણ આદેશ આપ્યો છે. કોર્ટે સ્પષ્ટ કર્યું છે કે દિલ્હીના જંતર-મંતર સહિત દેશના કોઈપણ રાજ્યમાં પ્રદર્શન કરનારા વિદ્યાર્થીઓ સામે હાલ પોલીસ કોઈ કાર્યવાહી નહીં કરે. જોકે આ રાહત માત્ર એવા વિદ્યાર્થીઓને મળશે જેમની સામે કોઈ ગુનાહિત પૃષ્ઠભૂમિ નથી.

સુપ્રીમ કોર્ટે બેકસૂર અને સગીર વિદ્યાર્થીઓને તાત્કાલિક મુક્ત કરવાનો પણ આદેશ આપ્યો છે. બીજી તરફ, જેમની સામે અગાઉથી ગંભીર ગુનાના કેસ નોંધાયેલા છે, તેમના કેસ પાછા ખેંચવામાં નહીં આવે.

ગુનાહિત ઇતિહાસ ધરાવતા લોકો સામે કાર્યવાહી ચાલુ રહેશે

સુનાવણી દરમિયાન કોર્ટ સમક્ષ રજૂ થયેલી માહિતી મુજબ CCTV ફૂટેજના આધારે ઓળખાયેલા કુલ 2,873 પ્રદર્શનકારીઓમાંથી 989 લોકોનો ગુનાહિત ઇતિહાસ સામે આવ્યો છે. આ લોકો સામે હત્યા, લૂંટ, ડકૈતી, અપહરણ, યૌન શોષણ સહિતના ગંભીર ગુનાઓના કેસ નોંધાયેલા હોવાનું જણાવાયું હતું.

સુપ્રીમ કોર્ટે સ્પષ્ટ કર્યું કે આવા લોકો માટે આ રાહત લાગુ પડશે નહીં અને તેમની સામે કાયદાકીય કાર્યવાહી યથાવત રહેશે.

પોલીસની કાર્યવાહી અંગે નિષ્પક્ષ તપાસનો આદેશ

સુનાવણી દરમિયાન પેલેટ ગન અને ઇલેક્ટ્રિક બેટનના ઉપયોગનો મુદ્દો પણ ઉઠ્યો હતો. આ અંગે કોર્ટે કહ્યું કે પોલીસ દ્વારા કરવામાં આવેલી કથિત અતિશય કાર્યવાહી અંગે સ્વતંત્ર અને નિષ્પક્ષ તપાસ થવી જરૂરી છે.

કોર્ટે કેન્દ્ર સરકાર અને દિલ્હી પોલીસને પોતાનો પક્ષ રજૂ કરવાની તક આપી છે. ઉપરાંત, જ્યાં અન્ય રાજ્યોમાં પણ હિંસાની ઘટનાઓ બની હોય તે રાજ્ય સરકારોને પણ પોતાનો પક્ષ રજૂ કરવાની મંજૂરી આપવામાં આવી છે.

'શાંતિપૂર્ણ વિરોધ લોકશાહીનો ભાગ છે'

સુપ્રીમ કોર્ટે પોતાના અવલોકનમાં જણાવ્યું કે લોકશાહીમાં શાંતિપૂર્ણ વિરોધ પ્રદર્શન બંધારણીય અધિકાર છે. વિદ્યાર્થીઓએ પોતાની માંગણીઓ સાથે શાંતિપૂર્ણ રીતે વિરોધ નોંધાવ્યો હતો અને તે લોકશાહી વ્યવસ્થાનો સ્વાભાવિક ભાગ છે.

કોર્ટે વધુમાં કહ્યું કે વિરોધ દરમિયાન જો કોઈ અતિશય કાર્યવાહી થઈ હોય તો તેની પારદર્શક અને ઊંડાણપૂર્વક તપાસ થવી જરૂરી છે.

તમામ પુરાવા સુરક્ષિત રાખવાનો આદેશ

સુપ્રીમ કોર્ટે તપાસને ધ્યાનમાં રાખીને તમામ મહત્વના પુરાવા સુરક્ષિત રાખવાનો આદેશ આપ્યો છે. તેમાં CCTV ફૂટેજ, ડ્રોન વિડિયો, બોડી-વોર્ન કેમેરાની રેકોર્ડિંગ, વાયરલેસ કમ્યુનિકેશનનો રેકોર્ડ, PCR કોલ્સનો ડેટા તેમજ પ્રદર્શનકારીઓ સાથે સંબંધિત ડિજિટલ ડેટા સુરક્ષિત રાખવાનો સમાવેશ થાય છે.

આ તમામ કેસોની આગામી સંયુક્ત સુનાવણી 3 ઓગસ્ટે હાથ ધરવામાં આવશે.