મેચ દરમિયાન ગર્લફ્રેન્ડ સાથે ફોન પર વાત કરવી ખેલાડીને પડી ભારે, BCCIએ ફટકાર્યો દંડ

તમિલનાડુ પ્રીમિયર લીગ (TNPL) દરમિયાન એક યુવા ક્રિકેટરને મેચ સમયે મોબાઇલ ફોનનો ઉપયોગ કરવો ભારે પડ્યો છે. BCCIની એન્ટી કરપ્શન એન્ડ સિક્યોરિટી યુનિટ (ACSU)ના નિયમોના ભંગ બદલ ક્રિકેટર સામે કાર્યવાહી કરવામાં આવી છે. અહેવાલ મુજબ, ખેલાડી મેચ દરમિયાન પોતાની ગર્લફ્રેન્ડ સાથે મેસેજ પર વાત કરતો ઝડપાયો હતો.

આ મામલે ક્રિકેટર પર શરૂઆતમાં બે વર્ષનો પ્રતિબંધ લગાવવાની ચર્ચા થઈ હતી. જોકે, બાદમાં તપાસ અને નિયમોના ભંગની ગંભીરતાને ધ્યાનમાં રાખીને આ નિર્ણયમાં ફેરફાર કરવામાં આવ્યો હતો. અંતે ખેલાડીને 1 લાખ રૂપિયાનો દંડ ફટકારવામાં આવ્યો છે.

મેચ દરમિયાન મોબાઇલનો ઉપયોગ કરતા ઝડપાયો

પીટીઆઈના અહેવાલ મુજબ, તમિલનાડુ ક્રિકેટ એસોસિએશનના એક વરિષ્ઠ અધિકારીએ જણાવ્યું હતું કે હાલ ખેલાડીનું નામ જાહેર કરવામાં આવશે નહીં. કારણ કે આ મામલે તપાસ ચાલી રહી છે.

આ 26 વર્ષીય ખેલાડી તમિલનાડુ તરફથી છેલ્લી સિઝનમાં બે અડધી સદી ફટકારી ચૂક્યો છે. એક મેચ દરમિયાન તે પોતાની ગર્લફ્રેન્ડને મેસેજ કરી રહ્યો હતો. જોકે, તેના પર ભ્રષ્ટાચાર સાથે જોડાયેલો કોઈ આરોપ નથી.

મેચ દરમિયાન પ્લેયર અને મેચ ઓફિશિયલ્સ એરિયા એટલે કે PMOAમાં મોબાઇલ ફોનનો ઉપયોગ કરવાની મંજૂરી નથી. આ નિયમનો હેતુ મેચ દરમિયાન ખેલાડીઓ અને અધિકારીઓ વચ્ચે થતી કોઈપણ અનધિકૃત વાતચીતને રોકવાનો છે.

પહેલા બે વર્ષના પ્રતિબંધની ચર્ચા થઈ હતી

BCCIની ACSU દ્વારા મામલાની તપાસ કરવામાં આવ્યા બાદ ક્રિકેટર સામે કાર્યવાહી કરવામાં આવી હતી. શરૂઆતમાં તેને બે વર્ષ માટે ક્રિકેટથી દૂર રાખવાની ચર્ચા થઈ હતી. જોકે, બાદમાં આ ઉલ્લંઘન ગંભીર ભ્રષ્ટાચારના કેસ જેટલું મોટું ન હોવાનું ધ્યાનમાં લેવામાં આવ્યું હતું.

ત્યારબાદ બે વર્ષના પ્રતિબંધના બદલે ખેલાડી પર 1 લાખ રૂપિયાનો દંડ ફટકારવાનો નિર્ણય લેવામાં આવ્યો હતો. TNCA તરફથી હાલ ખેલાડીની ઓળખ જાહેર કરવામાં આવી નથી.

IPLમાં પણ મોબાઇલના ઉપયોગ બદલ કાર્યવાહી થઈ હતી

મેચ દરમિયાન મોબાઇલ ફોનના ઉપયોગને લઈને અગાઉ IPLમાં પણ કાર્યવાહી થઈ ચૂકી છે. IPLની છેલ્લી સિઝનમાં રાજસ્થાન રોયલ્સના મેનેજર રોમી ભિંડર ટીમના ડગઆઉટમાં મોબાઇલ ફોનનો ઉપયોગ કરતા જોવા મળ્યા હતા.

આ મામલો સોશિયલ મીડિયા પર સામે આવ્યા બાદ વિવાદ થયો હતો. ત્યારબાદ BCCIએ રોમી ભિંડર સામે કાર્યવાહી કરી હતી અને તેમને 1 લાખ રૂપિયાનો દંડ ફટકાર્યો હતો.

TNPLના આ મામલામાં પણ ખેલાડીએ મોબાઇલનો ઉપયોગ કરીને નિયમોનો ભંગ કર્યો હતો. જોકે, તપાસમાં તેના પર ભ્રષ્ટાચારનો કોઈ આરોપ ન હોવાથી આખરે બે વર્ષના પ્રતિબંધને બદલે આર્થિક દંડ કરવામાં આવ્યો છે.