કચ્છ જિલ્લા પંચાયતની નવી ટીમ જાહેર, પ્રમુખ તરીકે પ્રભાબેન રબારીની વરણી

કચ્છ જિલ્લા પંચાયતના હોદ્દેદારોના નામો જાહેર

ગાંધીધામ ખાતે લાંબા સમયથી ચર્ચામાં રહેલી કચ્છ જિલ્લા પંચાયતની નવી ટીમના નામો આખરે જાહેર કરવામાં આવ્યા છે. ભારતીય જનતા પાર્ટી દ્વારા પ્રમુખ, ઉપપ્રમુખ, કારોબારી ચેરમેન સહિતના અગત્યના હોદ્દાઓ માટે ઉમેદવારી પ્રક્રિયા પૂર્ણ કરવામાં આવી છે. આવતીકાલે આ તમામ હોદ્દેદારોની સત્તાવાર જાહેરાત કરવામાં આવશે.

જિલ્લા ભાજપ પ્રમુખ દેવજીભાઈ વરચંદ, ચૂંટણી અધિકારીઓ અને પક્ષના અગ્રણીઓની ઉપસ્થિતિમાં ઉમેદવારી ફોર્મ ભરવાની કાર્યવાહી પૂર્ણ થઈ હતી. રાજકીય વર્તુળોમાં લાંબા સમયથી ચાલી રહેલી અટકળો વચ્ચે આખરે હોદ્દેદારોના નામો સામે આવતા ભાજપ કાર્યકરોમાં ઉત્સાહનો માહોલ જોવા મળ્યો હતો.

કોને મળી કઈ જવાબદારી?

ભાજપ દ્વારા જિલ્લા પંચાયત પ્રમુખ પદ માટે અંજાર તાલુકાની ભીમાસર-ચકાસર બેઠક પરથી વિજેતા બનેલા પ્રભાબેન મેરામણભાઈ રબારીની પસંદગી કરવામાં આવી છે. જ્યારે ઉપપ્રમુખ પદ માટે અબડાસાની નલિયા બેઠકના મહાવીરસિંહ જુવાનસિંહ જાડેજા પર વિશ્વાસ વ્યક્ત કરવામાં આવ્યો છે.

કારોબારી સમિતિના ચેરમેન તરીકે ભુજ તાલુકાની સુપર બેઠક પરથી ચૂંટાયેલા હરીશભાઈ નાનજીભાઈ ભંડેરીની વરણી કરવામાં આવી છે. આ ઉપરાંત સત્તાપક્ષના નેતા તરીકે ધનજીભાઈ ખીમાભાઈ ચાવડા અને દંડક તરીકે મેઘબાઈ જીવરામભાઈ ગઢવીને જવાબદારી સોંપવામાં આવી છે.

મહાવીરસિંહ જાડેજાની પસંદગી ચર્ચામાં

જિલ્લા પંચાયતના ઉપપ્રમુખ પદે પસંદ થયેલા મહાવીરસિંહ જુવાનસિંહ જાડેજા નલિયા વિસ્તારમાં સેવાભાવી અને લોકસેવા માટે જાણીતા પરિવાર સાથે જોડાયેલા છે. પેઢી દર પેઢી સમાજકાર્ય અને જનસેવામાં સક્રિય રહેલા પરિવારના પ્રતિનિધિ તરીકે તેમની પસંદગીને વિસ્તારમાં વિશેષ મહત્વ આપવામાં આવી રહ્યું છે.

પશ્ચિમ કચ્છનું રાજકીય પ્રભુત્વ વધુ મજબૂત

જિલ્લા પંચાયતની આ નવી વરણીમાં પશ્ચિમ કચ્છનું પ્રભુત્વ સ્પષ્ટ રીતે સામે આવ્યું છે. પાંચ મુખ્ય હોદ્દાઓમાંથી માત્ર પ્રમુખ પદ અંજાર તાલુકાને મળ્યું છે, જ્યારે બાકીના અગત્યના હોદ્દાઓ પશ્ચિમ કચ્છના વિસ્તારોના ફાળે ગયા છે.

રાજકીય વિશ્લેષકોના મતે ભાજપે પ્રાદેશિક સમીકરણો, સમાજ પ્રતિનિધિત્વ અને સંગઠનાત્મક સંતુલનને ધ્યાનમાં રાખીને આ પસંદગીઓ કરી છે. “મીની સંસદ” તરીકે ઓળખાતી કચ્છ જિલ્લા પંચાયતની આ વરણી આગામી સ્થાનિક રાજકારણમાં મહત્વપૂર્ણ સાબિત થઈ શકે છે.

ભાજપે વિકાસના એજન્ડાને આગળ વધારવાનો વિશ્વાસ વ્યક્ત કર્યો

કચ્છ ભાજપ પ્રભારી ફલજીભાઈ ચૌધરીએ જણાવ્યું હતું કે નવી ટીમ વડાપ્રધાન નરેન્દ્ર મોદીના વિકાસના મંત્રને ગ્રામ્ય સ્તર સુધી પહોંચાડવા માટે કાર્ય કરશે. જિલ્લા ભાજપ સંગઠન, સાંસદ, ધારાસભ્યો અને બૂથ સ્તરના કાર્યકરોના સંકલિત પ્રયાસોના કારણે જ જિલ્લા પંચાયતની ૩૮માંથી ૩૪ બેઠકો પર ભાજપનો ભવ્ય વિજય શક્ય બન્યો હોવાનું તેમણે જણાવ્યું હતું.

નવનિયુક્ત હોદ્દેદારોને શુભેચ્છા પાઠવતા પક્ષના આગેવાનોએ વિશ્વાસ વ્યક્ત કર્યો હતો કે નવી ટીમ સરકાર અને સંગઠન વચ્ચે સુમેળ જાળવીને પ્રજાહિતના કાર્યોને ગતિ આપશે.